政情：新民公記 新婚磨合不順

公記請願遇人不「淑」？

新民黨同公記上月初結盟，好多政界中人睇得出佢哋應該唔係兩情相悅而結合，而係盲婚啞嫁，結果唔使風水佬呃你十年八年，雙方嘅深層次矛盾唔使一個月就開始慢慢浮現喇。就立場方面，話晒新民黨一直走慣中產路線，而公記又紮根地區多年，所以就算公記曾經嘗試過打中產議題，但為咗維護本身嘅忠實支持者，始終都兼顧基層權益嘅。

有公記中人就話，雖然佢哋多次去立法會就中產議題請願，但其實所用嘅口號同標語都要諗過度過，以免支持者誤以為佢哋咁忘本，同新民黨結婚就淨係關顧中產權益，忘記基層喎。其次係上月底財政司司長曾俊華（鬍鬚曾）公布預算案當日發生咗段小插曲，據聞公記當日去政府總部外請願，葉太就拍心口話會盡量安排佢哋親手向鬍鬚曾遞交請願信兼合照，但估唔到咁都出事。

話說當日葉太的確有兌現承諾，請到鬍鬚曾出去接公記成員嘅請願信，但可惜公記請願嘅位置渺無人煙，皆因其他政黨同記者都集中去晒政府總部嘅另一邊示威，所以佢哋完全冇機會見報，極其量只係有幅相放落區議員工作報告宣傳吓啫，認真（火羂）爆！

大呻唔明葉劉諗乜

所以有公記成員就話，始終唔明白葉太嘅諗法，唔知佢係咪因為孭住行政會議成員個身份，先安排佢哋去啲記者見唔到嘅位置做吓樣，影張相，求其向公記成員交功課，安撫吓佢哋咁話。

其實新民黨同公記結盟，公記沙田區議員潘國山做新民黨副主席，而葉太就做咗公記嘅會長，成件事已經米已成炊，如果喺立場上未能縮窄分歧，就好似兩夫婦各持己見拗撬多，關係惡化，最後只會離婚收場。