政情：「自民黨」唔避忌 仲有下文
自由黨同民主黨（白鴿黨）早前首次破天荒聯手發布公共醫療政策建議書，被譏笑為「自民黨」，難為佢哋唔怕外界閒言閒語，繼續眉來眼去。
將約見梁智仁講醫療
批發及零售界嘅自由黨議員方剛話，兩黨下星期會約見醫管局主席梁智仁，討論公立醫院人手不足、資源分配不均等問題喎！
方剛尋日接受白鴿黨主席劉慧卿（卿姐）訪問，卿姐一開波冇耐就單刀直入問方剛，有冇自由黨支持者對兩黨發表聯合報告感到奇怪，甚至叫佢哋唔好同白鴿黨合作。方剛就話，該黨唔少支持者都好贊成兩黨多啲合作溝通，又話建制派同泛民主派唔使吓吓企到咁硬，咁樣只會對市民不利。稍後佢哋會向所有建制派議員分發建議書，睇吓佢哋有咩意見。
卿姐就話已經向泛民飯盒會徵求意見，不過大家暫時未有時間傾。至於兩黨未來仲有啲咩議題可以再合作，兩人就顯得有啲避忌，淨係話會一步一步嚟，莫非佢哋都察覺再合作落去遲早出事？