政情：中環出更：on.cc東網效率一流個個讚好
為咗鼓勵市民做好廚餘回收、支持環保，由特首夫人梁唐青儀發起嘅「齊惜福」尋日喺鑽石山一個商場搞咗個名人烹飪比賽，城中政商界人士及多位名媛都有捧場。東方報業集團旗艦網站「on.cc東網」全程直擊活動過程，並分段快速上載活動精華內容，就連梁太都大讚「on.cc東網」「效率一流」，名副其實係「上東網、知天下」！
梁太尋日除咗為烹飪比賽擔任評判外，仲同在場嘅玩具大王蔡志明太太蔡李惠莉、商人邱達昌太太邱吳惠平、莎莎國際老闆娘郭羅桂珍、太子珠寶鐘錶主席鄧鉅明太太鄧宣宏雁、中電企業發展總裁莊偉茵（Quince）等名媛，齊齊參觀廚餘機等環保設備。梁太仲同大家分享減少廚餘嘅心得，話政府有資助屋苑添置廚餘機計劃，就算唔打算買廚餘機都可以將可回收嘅垃圾分類棄置，咁屋企個垃圾桶就會好乾淨，佢仲話禮賓府嘅垃圾桶通常兩、三個星期先裝得滿咁話。
講番烹飪比賽，幾位立法會議員包括葛珮帆（EQ）、蔣麗芸（Ann）、盧偉國、黃碧雲分別夥拍城中名人大鬥廚藝。食素嘅EQ就夥拍Quince煮素菜「八寶袈裟」，賣相唔錯。同名廚周中一組嘅黃碧雲就用碌柚衣蒸腩肉，因為只需放落鑊蒸，所以佢哋就得閒到喺度食碌柚，周中仲偷食隔籬組嘅半製成品添！大家完成大作後，梁太就逐個試食畀分，最後人人有獎、皆大歡喜。
「好快好新 資料詳盡」
呢個活動相當精彩，「on.cc東網」就即時將活動內容分段上網，Quince一見關於自己嘅報道，大讚短片夠晒「原汁原味」，能夠真確反映成個活動詳情，仲好雀躍咁畀梁太睇。而梁太之後去到探訪新家園協會時，就話一向都知「on.cc東網」好有效率，而且「效率一流」！平時喺街或立法會都會睇「on.cc東網」嘅EQ話︰「連八寶袈裟都寫埋，好快好新，資料好詳盡！」阿Ann仲話要將「on.cc東網」報道活動嘅短片擺上社交網站同朋友分享添。
卓妮