中環出更:被邀開金口高永文扭擰

曾經參加今屆立法會選舉嘅人民力量「星屑醫生」歐陽英傑,尋日喺社交網站自爆有「社運黑材料」,仲自我引爆黑材料內容,就係上載一張同食物及衞生局局長高永文嘅合照。星屑醫生喺前晚聖誕夜為西醫工會周年聖誕派對擔任司儀,期間仲同高永文合唱聖誕歌同一曲《朋友》,佢話,雖然高永文歌喉有番咁上下,但似乎好怕醜,唔肯一個人企喺台上清唱,要拉住其他司儀伴唱。

當晚出席周年聖誕派對嘅除咗高永文外,仲有副局長陳肇始、香港大學醫學院院長梁卓偉、醫院管理局新任主席梁智仁等。星屑醫生話,工會原來諗住邀請高永文上台致詞,但對方一聽到要講番兩句就耍手擰頭,話自己出席只係為咗玩,無諗住搶鏡喎。

既然高永文唔肯致詞,星屑醫生就改為叫佢上台唱歌,但佢初時都係不太情願,最後只喺半推半就下都上台唱番兩句。雖然高永文啱啱病完,但佢依然玩到夜晚十點幾鐘先走,都算係畀面喇。

卓妮

第一手消息請下載on.cc東網iPhone/iPad/Android/Windows Phone Apps