政情：公民講場：「犯國規」死撐 沖涼歪理

被稱為「犯國規」嘅立法會議員范國威，早前違規帶留守喺政府總部嘅香港電視網絡員工去立法會休息室沖涼，當日仲趕走保安員，立法會行政管理委員會日前就決定向佢發出警告信。不過，范國威唔肯道歉兼毫無悔意，繼日前寸嘴建議秘書處將休息室沖涼房起多幾格，方便日後帶人去沖涼外，尋日又死撐話休息室沖涼房使用率低，就算帶其他人去沖涼都冇損害公眾利益，亦唔會剝奪其他議員使用沖涼房嘅權利，仲話日後會繼續帶示威者去立法會沖涼咁話。講到歪理盡出，點解佢又唔開放自己屋企個浴室畀示威者沖涼呢？