前財爺梁錦松（阿松）日前傳出會由全球最大私募基金嘅黑石集團大中華區主席，過檔到老牌發展商南豐集團擔任行政總裁一職，惹起唔少商界人士揣測，有人以為佢有意重返本港商界，甚至想鋪路選特首。不過，據一名熟悉阿松嘅商界中人透露，其實阿松肯減人工轉職南豐，主要係為咗太太伏明霞同三個仔女，唔存在有咩野心。
原來阿松半年前已經開始向身邊嘅人呻，話黑石份工錢就搵到，但由於佢負責大中華地區，所以經常要周圍飛，一個月最少公幹四次，每次都逗留兩、三日，搞到好少時間陪家人，呢個情況捱咗幾年。不過，佢囡囡今年已經十歲、排第二個仔亦有九歲，正值重要成長期，如果唔抽多啲時間陪仔女，對小朋友成長有好大影響，所以阿松年初已萌生離職念頭。
咁啱南豐最近籌備上市，需要搵重量級人物幫手「鍍金」，有人拉線搵咗阿松過檔。阿松亦睇中南豐作為一間老牌發展商，極大部分業務都喺香港，相信可以專心喺香港返工，變相多咗時間陪老婆仔女，所以聽聞阿松寧願大幅減薪過檔南豐，都要捨棄黑石呢份高薪厚職喎。