中環出更:「書海翱翔」助童夢飛揚

知識改變命運,想脫貧就更加要讀書。《閱讀.夢飛翔》文化關懷慈善基金為籌募經費,幫內地農村學校興建圖書館及推行閱讀教育,早前舉行「書海翱翔夢飛揚」慈善晚宴,邀請咗民政事務局副局長許曉暉、教育界立法會議員葉建源、湖南省海外聯誼會理事暨副秘書長余大紅、前資訊科技界立法會議員譚偉豪、香港菁英會榮譽主席白富鴻主禮。

農村建圖書館 湘生受惠

基金主席梁偉明喺晚宴期間,報告基金過往工作,並簡介未來發展。當晚大會邀請咗湖南省婁底市雙峰縣教育代表團出席,分享佢哋農村學校嘅情況及對基金工作嘅睇法;而一班來自受助農村嘅內地學生,仲即場以圖書館推介及話劇表演方式,展示佢哋接受閱讀教育薰陶嘅成果。

之後基金閱讀大使潘芳芳就分享佢對閱讀教育嘅睇法,呼籲台下賓客多多捐輸,以幫助內地農村小朋友圓夢。晚宴籌委會主席李明斌話,要特別多謝各界捐助及捐贈拍賣品。當晚眾人熱烈競投,氣氛激烈,順利為基金籌得四十六萬元善款。

卓妮

第一手消息請下載on.cc東方互動iPhone/iPad/Android/Windows Phone Apps