政情：煲冬瓜爛透 莫乃光(火羅)爆
立法會准許議員用三文兩語發言，但其實用咩語言都好，最緊要係對方聽得明，否則識講七國語言都無用，資訊科技界議員莫乃光（Charles）就係一個活生生例子。話說尋日佢為咗想寸爆有電視台唔准旗下藝員接受其他電視台訪問時講廣東話，所以特登以普通話發言，點知講完一大輪都無人明佢講咩，惟有死死哋氣講番廣東話，呢啲咪無自知之明丟晒架囉！
想寸Greg蘇反出醜
Charles尋日向商務及經濟發展局局長蘇錦樑（Greg蘇）質詢，問有關無線電視被罰款九十萬元一事，期間佢特登用普通話發言，先批評通訊管理局係「無牙老虎」，然後又質問究竟無線「給了錢沒有？」當時連負責做手語的即時傳譯員都呆咗，似乎唔知佢講乜。Greg蘇好坦白話聽唔明，叫阿Charles問多次，Charles惟有(火羅)爆講番廣東話，呢鋪佢真係搵石頭擲自己對腳喇！
之後Charles解釋話自己普通話水平麻麻，但因為唔少藝人都被壓迫講普通話，所以佢咁做係反映一般藝員慘況。究竟呢啲算唔算「行為藝術」呢？至於另一位經常被質疑語言能力嘅新丁鍾樹根，過去已經誤傳佢去西九管理局開會要用即時傳譯，加上佢係香港大學校董，咁啱最近港大委任外國人馬斐森做新任港大校長，唔少人都擔心樹根嘅英文根基唔掂，將來開校董會點算好？
鍾樹根自稱英文掂
樹根尋日主動解釋疑團，話港大校董會會議一向都用英語，徐立之年代都係咁啦，佢未試過聽唔明一粒字喎，仲強調自己讀番書，點會唔識英文呀！有記者建議佢試吓喺立法會以英語發言，以示英語有幾掂，點知樹根話自己講咩語言，係視乎對咩人，無理由對住中國人都講英文咁怪喎。樹根最後補充，如果有人質疑佢英文唔掂，可以私下考佢，佢絕對無任歡迎喎。