中環出更：黃林碧瑢舉家 籌款展「膳心」
啱啱過去嘅星期日，寧靜嘅大潭道陽明山莊好熱鬧，事關嗰度又再舉行慈善嘉年華幫「膳心連基金」籌款。基金創辦人黃林碧瑢（Vanessa）同三位千金齊出動，佢哋一時喺攤位擺賣，一時張羅舞台表演，期間不停招呼專程上山去捧場嘅好友，忙到冇時停。黃家大小姐黃蕊蘋孭住部相機，戴上草帽同黑超做大會攝影師，十分搶鏡。
當日花園平台擺滿數十個攤位，售賣物品包括衫鞋、手工藝品及食物，琳瑯滿目，現場仲搭咗個舞台做表演，好多小豆丁跑上跑落，歡樂聲不斷。救心代理商泰山企業老闆林添茂囝囝林斯亮（Erik）亦喺度擺檔，佢哋唔止係山莊嘅住客，而且同Vanessa一樣係台灣人，梗要出錢出力支持啦。
Erik原本從事金融業，依家返公司幫手，仲將爸爸嘅生意發揚光大。近期佢睇好BB市場，引入德國知名有機嬰幼兒食品，大受歡迎，尤其係奶粉，依然係搶手貨。台灣「最帥宅男」歌手林利豪亦到場獻唱，原來佢同黃家三姐妹係表姐弟。Vanessa笑笑口話，姪仔係參加台灣選秀比賽脫穎而出嘅實力派歌手，所以特登叫佢跨海嚟助陣。
基金添兩車 為基層送暖
講起膳心連發展近況，Vanessa話近期將再添購兩部車，以便將溫暖菜飯盡快分送畀受惠者。十二年前，身為陽明山莊創辦人黃週旋新抱嘅Vanessa，見酒店食肆大量丟棄新鮮食材好浪費，於是由山莊會所餐廳開始，展開回收食物轉送貧困人士嘅行動，令惜食觀念漸漸普及化。
卓妮