特首梁振英（CY）早前講到明，要教育局就小學老師林慧思喺旺角街頭爆粗辱罵警員一事提交報告，搞到外號「吳得掂」嘅教育局局長吳克儉，本來話事件要告一段落，都立即改口話要跟進。不過，正在參加教育界訪京團嘅吳得掂尋日就透露，原來林慧思任教嘅寶血會培靈學校至今都未交報告畀佢，連帶佢都未交報告畀特首。吳得掂身為教育局之首都闊佬懶理，唔催促學校交「功課」不特止，仲賴嚟賴去，真係唔知佢想點！
本來欠交功課，認衰快快趣補交都算喇，點知吳得掂仲話，唔會為校方設立交報告時限，費事畀壓力佢哋咁話。若果廣大學生都由吳得掂做老師，就認真「皆大歡喜」喇，因為老師唔會追你交功課，「費時畀壓力你」嘛。
不過，無時限嘅功課，你估會唔會有人交呢？莫講話學校因為林慧思未返學就唔交報告住，就算一味拖字訣唔交報告，睇怕都無所謂囉！辦學團體耶穌寶血女修會教育事務主任黃美美尋日回覆，自稱依家身在北京，唔知道詳情，所以唔方便作評論喎。