政情:月薪近10萬 樹根無病呻吟

香港島各界聯合會首席會長丁毓珠(珠姐)前年開始不再出任東區區議員,結束近三十年區議員生涯。不過,珠姐自言作為「東區人」,雖然不在其位,但仍然對地區事務好上心,日前出席活動就捉住「雙料議員」鍾樹根密密斟,期間二人除咗傾到尚未拍板嘅東區地區重點工程一億元撥款外,仲傾到議員嘅薪酬問題。

嫌低薪畀珠姐篤爆

話說珠姐同樹根前日出席港島十‧一嘉年華活動擔任主禮嘉賓,現場所見佢哋二人由台下傾到上台上,依然係雞啄唔斷,好似有講之不盡嘅話題咁。樹根事後透露,原來佢趁機同珠姐「吐苦水」,笑言自己依家係最低人工嘅區議員之一,因為佢做咗立法會議員後,只可以攞到三分之二嘅區議員薪酬,點知被珠姐睇穿,即時話佢仲有份大啲嘅薪酬,樹根先笑笑口無再講落去。

其實樹根做咗「雙料議員」後,連埋立法會議員最大嗰份人工,合計每月薪酬有近十萬元,相比以前只係做東區區議會主席嘅月薪約四萬五千元,多咗一倍有多。珠姐辦學多年,數口一定好精,難怪樹根一講到錢,即被珠姐KO(擊倒),樹根都係咪再無病呻吟喇!

第一手消息請下載on.cc東方互動iPhone/iPad/Android/Windows Phone Apps