政情：公民講場：老鴿拗房策 雙李互插

長遠房屋策略督導委員會（長策會）日前發表諮詢文件，點知演變成「雙李」鬼打鬼，即兩名白鴿黨前立法會議員李永達（高達）同李華明（肥仔明）互插互駁嘅場面。話說港府十年建屋大計曝光後，身兼土地監察主席嘅高達，除咗話未來十年興建四十多萬單位屬低指標，又批評長策會無計算工廈劏房戶等新增房屋需求，擺明向長策會挑機。本身係長策會成員嘅肥仔明，尋日就喺電台節目反駁，指長策會估算嘅數字已經包括所有劏房戶，又爆料話曾致電高達嘅研究助理，提醒對方嘅論點有謬誤。估唔到兩隻老鴿平時冇乜嘢，竟然為咗房屋問題針鋒相對。