政情：為愛駒打氣 董吳玲玲宴姚廐
漫長暑假完結，又輪到新馬季開鑼。前仁濟醫院主席兼帝皇翡翠行政總裁董吳玲玲及其丈夫董中浩，早前就喺沙田馬會會所宴請練馬師姚本輝及其馬房員工近三十人，為去季戰績唔錯嘅愛駒「翡翠明星」及「翡翠寶寶」祝捷兼打氣。
首製翡翠陀飛輪錶
董太話，呢個暑假好忙，事關佢跨界做腕錶，夥拍做港產陀飛輪錶嘅寧基集團董事長沈墨寧，日夜趕工，克服萬難，終於將翡翠鑲入陀飛輪錶面，成功製造全球首隻翡翠陀飛輪錶，喺舉行中嘅香港鐘表展成為焦點。
董太話，鑲嵌測試期間，翡翠嘅損耗好大，個個睇到好心痛，但佢仍決意去做，事關多年來一直有外國鐘錶業嘗試去做，但始終唔成功。翡翠係中國五千年文化嘅一部分，呢件「天下第一」嘅壯舉，自然要由中國人完成。雖然閃耀嘅翡翠陀飛輪錶仍未最後定價，但據聞售價數以百萬元計。