政情：炸白鴿炆單仲偕 肥亨夠火候

激進議員增 為官更難

話說肥亨主要講政府管治問題，所以首先傾到行政會議召集人林煥光近日發表嘅「政府癱瘓論」。肥亨覺得林煥光所指嘅其實係立法會癱瘓咗政府，而唔係政府已經癱瘓。不過，佢承認依家做官者較以前難做，皆因立法會多咗激進議員，不時又拉布、又流會，部分議員嘅質素更加低到「慘不忍睹」，喺觀感上，政府同議會有好大個「鴻溝」咁話，所以佢建議議員同官員都應該自我增值，多啲溝通。

肥亨坦言，以前政府管治氣氛都唔太好，皆因嗰時成日被鬧「官商勾結」，搞到商界唔敢同官員食飯，點知依家啲議員就去接受國泰同微軟嘅豪華款待，「嗰位接受款待嘅白鴿黨員」，出席微軟活動仲多過佢做官嗰陣時。肥亨話，其實呢啲事冇乜問題，因為香港係經濟體，政界人士當然要同商界緊密溝通。不過，佢希望大家以後當見到商界同官員食飯，就唔好再話係「官商勾結」喎。

談仙股事件 寸陳茂波？

肥亨之後又話，其實主事某一範疇嘅官員，唔應該喺所負責嘅範疇出問題，否則會畀市民唔好嘅觀感，而從政者道歉其實並無問題，有時仲可以消吓市民嘅怒火添。好似佢當年喺仙股事件上，其實政策並無做錯，但因自覺影響到政府聲譽，所以鞠躬道歉。唔知佢係咪講緊捲入囤地風波嘅發展局局長陳茂波一直唔肯道歉呢？

肥亨仲自爆話，喺事件中滿肚「死貓」，皆因當年佢準備道歉前，建議過叫晒全部傳媒到場，然後做鞠躬呢一幕，點知政府新聞處一名資深官員話，淨係叫電子傳媒就得，當時佢又係新仔，咁就被跣咗一鑊喇。