中環出更：莊家彬煙癮起買火機
唔少吸煙人士都習慣飯後一支煙，莊士集團太子爺莊家彬（Albert）都唔例外。早前一個下午，卓妮見到Albert一支公現身中環，佢由太子大廈步出遮打道行人路，走到路邊一個報紙檔前停下，起初以為佢想買報紙，但原來係買打火機至真。Albert買下打火機後，急不及待取出一支煙點火，雖然佢狀似趕時間，但仍好守規矩咁企喺垃圾桶旁邊「打邊爐」，最後將煙蒂丟進煙灰缸後先至離開。
當日下午約兩點半鐘，啱啱過咗食晏時間，卓妮見着住黑色西裝褸配牛仔褲嘅Albert由太子大廈步出，佢由褲袋取出一包香煙，似乎想歎番支飯後煙嘅時候，先至發覺冇帶打火機喺身。佢於是行到最近距離嘅遮打道街頭報紙檔買打火機，期間仲企喺報紙檔前，望住啲雜誌（目及）咗一陣。
企定定一分鐘「打邊爐」
當時Albert煙癮正濃，迅即點起一支煙，但佢冇邊行邊食，反而走到附有煙灰缸嘅垃圾桶旁邊「打邊爐」，企定定大口大口咁抽。不出一分鐘，佢已經將香煙吸到盡，最後將煙蒂丟進煙灰缸內。「叉電」完畢嘅Albert似乎好趕時間，急急腳咁返回歷山大廈辦公室。
卓妮