中環出更：黃錦成準備好事成雙
九龍表行董事總經理黃錦成嘅寶貝女兒黃雅芝（Angie），最近忙到不得了，事關佢一邊打理家族生意，一邊修讀中文大學嘅課程（EMBA），而且已覓得真命天子，梗要把握每分每秒同男友拍拖。黃錦成就笑笑口話，囡囡呢個時候最靚喇，佢會做好心理準備隨時嫁女喎。
早前Angie出席一個活動時，喜孜孜同卓妮介紹男友賴明俊（Jovi）。Jovi係一間印刷包裝集團嘅第三代，同Angie係小學同學，後來大家各自去外國留學，直至前年喺小學同學嘅聚會上重逢，今年初至正式「過電」拍拖。Jovi笑稱，同Angie嘅緣分好似早已註定，Angie聽罷甜到漏，話打算同男友搞一盤新生意，至於詳情就要賣關子喇。
着手寫書慶紅寶石婚 隨時嫁女
黃錦成對未來女婿都好滿意，話最緊要囡囡鍾意。講起夫妻相處之道，黃錦成透露，已着手寫書慶祝結婚四十周年，書中將憶述兩公婆嘅相處點滴，希望趕及明年六月「紅寶石婚」紀念日前出版。