政情：龐愛蘭為貓屎咖啡平反

周伯展（右起）、龐愛蘭、麥Sir及黃冠樺齊齊推廣野生麝貓咖啡。（潘翠華攝）

Scarlett話，從來對咖啡冇特別興趣，直至遇上咖啡黃，畀佢品嘗第一口野生貓屎咖啡滋味後，即一試難忘。當日Scarlett拉埋醫學會副會長周伯展齊齊品嘗野生貓屎咖啡，咖啡黃就搵來佢嘅得意門生麥Sir親自研磨及沖製咖啡，仲善用唔同產地咖啡嘅特性，炮製出一系列以咖啡入饌嘅佳餚。

• 矜貴嘅野生麝貓咖啡，入口甘甜順滑。

黃冠樺賣書收益助研癌症

咖啡黃自年前發現患癌，一直與死神搏鬥，樂觀面對人生，從無間斷向社會推廣咖啡文化。今年初佢出版一本有關咖啡嘅書籍，分享品啡心得，並將賣出書籍嘅收益捐畀亞洲癌症研究基金會。下月於灣仔會展舉行嘅年度美食展，咖啡黃同麥Sir仲會喺展覽中示範即場炒咖啡豆，Scarlett話到時會落場炒埋一份喎。