政情：修訂私隱例龜速 議員圍插黃繼兒

國泰洩密醜聞 仍未完成調查

立法會議員葛珮帆（EQ）提及三宗醜聞之一、因管理不善而在全球最佳航空公司排名榜節節下跌嘅國泰航空，去年十月聯同其全資子公司港龍航空洩漏約九百四十萬名乘客個人資料嘅醜聞，指事件經過逾半年始被揭發，但就毋須受法例監管而進行通報，認為明顯存有漏洞，批評公署喺今年工作重點中，冇包括啟動修改法例程序，係咪想等調查完成先做，如果係咁就難以接受咁話。

黃繼兒解釋，國泰事件仍在調查當中，又指修例已到尾聲，稍後將會按程序執法。佢又辯解話，唔係故意等調查完成先至修例，不過修例涉及好多技術問題，處理需時，可能時間上同調查有所脗合，但只不過係巧合喎。

議員黃碧雲同埋陳志全（慢必）都鬧埋一份，慢必就提到，國泰事件發生後，政府曾經提出會參考外國經驗，研究收緊私隱條例，質問何時先有結果。佢仲形容現時私隱條例有如「無牙老虎」，欠缺阻嚇力，質問政府係咪唔想下放權力畀公署做相應調查。

黃繼兒就話，等三宗大型資料外洩事件完成調查後先修例，或者可以從中有所啟示，令修例更加完善，只要能堵塞漏洞嘅都會考慮。至於被批係「無牙老虎」，黃認為係因為條例訂立喺二十年前，當時冇諗到科技發展同個人資料關係咁密切咁話。

其實科技發展一日千里，如果次次都要等調查完成先修例，可能已經又變得落伍，唔通公署要等爆多幾單大型資料外洩醜聞，先至識得唔好懶懶閒，盡快跟上時代步伐？