中環出更：切燒豬慶生唐太沖喜？

連日來一直進行僭建復修工程嘅唐宅，唐唐兩公婆經常都有現身視察，尋日中午十二點幾鐘，唐唐同太太前後腳抵達約道大宅。一抵埗後兩人快速關上大宅門，咁神秘，搞乜呢？原來裝修工人早已擺定隻大燒豬上枱，等唐唐兩公婆一埋位，切燒豬拜神儀式正式開始。

切完燒豬，工人仲夾晒嘴形唱生日歌，歌聲傳到大宅外都聽到，首歌係唱畀唐太聽嘅，賀佢生日。唐唐都好識做，將燒豬當成生日蛋糕，分畀屋內嘅裝修工人食，連門外等候嘅司機都有份。兩人喺大宅內逗留約二十五分鐘就走人。講起單官司，唐唐擺出招牌式微笑，笑而不答。問佢復修工程進度成點？佢亦一味傻笑唔答。

工人將肥美燒豬擺上枱，疑為唐太慶祝生日及開工拜神儀式做準備。（蘇文傑攝）	食完燒豬嘅唐英年步出大宅門外，見到喺吊臂車上嘅記者，風騷揮手。	唐太飲可樂送燒肉，心情似乎未受官司影響。

復修工程 唐唐擇吉日動土

唐唐兩公婆離開大宅後，工人開始動工，將日前已搬入大宅嘅工字鐵進行度位及切割工程，但灌漿為僭建地下室「填窿」，就未展開喇。至於工程到底要搞幾耐？真係要問過唐家人先知道，但有喺附近做嘢嘅裝修工人就預計，工程起碼要兩個幾月，有排搞喎。

卓妮事後睇番《通勝》，話尋日宜動土、拆卸、修造，而嫁娶、祈福都啱，總知諸事皆宜，絕對係大好日。唐唐擇良辰吉日動工，唔通佢想一洗霉氣？

卓妮