Loretta爽爽 唔使黐立立

Loretta好似大部分香港人咁，心想Keep Fit又怕熱，所以一直冇的起心肝做運動：「我知做運動係對身體好，但一諗到會搞到成身汗『黐立立』，仲要有時冇涼沖就更惡頂，所以自細我都好憎上P.E.堂（體育堂），運動就更加少！」其實要解決Loretta嘅煩惱係非常簡單，只要搵啲可以浸喺水入面嘅運動，就可以涼浸浸咁唔覺自己出咗汗，更加唔會『黐立立』啦！不過，Loretta又嫌齋游水好悶，為咗滿足佢咁多要求，我哋就搵嚟教練YY，教佢跳水中aerobic。

Keep Fit 紓緩疲勞好見效

顧名思義，水中aerobic就係喺水入面跳健康舞，但點解要喺水入面跳？教練YY解釋：「我哋喺水中做健體運動，可以借助水嘅阻力嚟加強訓練效果，對強化肌肉力量同心肺功能好有效。另外，水嘅承托力可減去身體一半重量，可幫我哋輕鬆咁完成一啲喺陸上屬高負荷嘅動作，咁樣就真係叫做事半功倍嘞。」

Loretta專心聆聽教練YY嘅指導。	放大圖片	Loretta落水前認真做熱身運動。

曾經喺「小學雞」時學過中國舞嘅Loretta，玩起水中aerobic都有板有眼，仲好快學識「入門5式」，初試啼聲就話一玩上癮：「之前玩跳舞好驚扭親手腳、又容易用錯力而受傷，但喺水入面就可以放心跳，因為有水壓托住自己唔會咁易整親，仲可以玩到好多得意花式。不過，最重要就梗係可以舒舒服服咁跳，唔會熱到成身汗『黐立立』，仲幾爽添！可能我平時少運動，今次跳完水中aerobic後雖然有啲攰，但反而醒神咗好多，放鬆同埋紓緩精神疲勞！」

裝備 空心啞鈴︰可着泳衣或跣水裝束，並以舒適為主，因衞生問題，盡量避免着棉質T恤	入門5式大解構 第一式︰這個拿着啞鈴前後擺動的動作，是用來練二頭肌及老鼠仔，平時在陸上做好容易用錯力，現在有水壓保護，令到肩頸位置不易受傷	第二式︰練完二頭肌想整條手臂平衡一點，可以做這個上下拉動動作，可鍛煉三頭肌，令整條手臂都靚靚
第三式︰這個交叉手臂壓逼動作，重點在於力量放在前臂位，可以鍛煉手腕及前臂，平時工作過後就不會容易覺得累	第四式︰這大字形開合動作除可一次過練大腿外側及膊頭肌肉之外，還可以加強手腳協調，練多點手腳都會靈活些	第五式︰有時候工作坐得久會腰痠背痛，多做這來回拉展動作除可拉鬆及紓緩背痛之外，更可左右交替地鍛煉背肌

注意事項

●一如做其他運動，跳水中aerobic前熱身拉筋運動，防止抽筋

●運動前一小時切忌飽肚或空肚，可先吃一點流質食物補充體力

●有皮膚病或傷口就不宜落水，以免交叉感染

●由於運動量不高，適合有心臟病或不能作劇烈運動人士，但要先向教練查詢

●不懂游泳人士也可參加

文：司徒子文

鳴謝：德藝會（2993 6688）