中環出更：世姪女闖公關界 吳錦青力撐
做鐘錶生意嘅博愛醫院副主席吳錦青滿腹生意經，經常教年輕人勇敢創業，走出自己嘅人生路。早前有日下午，卓妮喺尖沙咀遇見吳錦青同太太黃海燕拍拖行街，身邊仲有一位後生靚女，原來係佢世姪女嚴煥兒（Mona）。Mona家族喺內地做地產生意，衣食無憂，但小妮子志氣唔小，磨拳擦掌欲進軍公關界，吳錦青作為前輩都畀咗唔少意見。
嚴煥兒經驗豐富
咪睇Mona咁嬌柔，其實睇得又打得，佢修畢工商管理碩士（MBA）後，曾經喺大型上市公司工作，自己亦開過獵頭公司，依家就幫手打理家族生意，經驗都幾豐富。
吳錦青最近就忙於北上，事關佢家族喺福建泉州搞緊一個大型嘅綜合開發地產項目，總投資額達八十億元，亦係佢首次躋身地產商之作，所以唔敢怠慢。佢話，雖然內地推出諸多壓抑樓價措施，但呢個項目係舊城改造項目，樓價屬內地市民可接受範圍，所以唔怕受到市場氣氛影響。
卓妮