中環出更：過來人王傲山 助邊青「傲翔」
身為仁愛堂總理嘅金融才俊王傲山（Marcus），一年前成立「傲翔獎勵計劃」，以獎學金鼓勵及表揚重回正軌嘅邊緣青年，月前佢仲成功將計劃註冊為認可慈善機構。原來Marcus年輕時都係奀皮仔一名，喺加拿大留學時經常唔返學去打桌球，學業差強人意，投身社會後亦諗過放棄自己，多得長輩循循善誘，至有今日成就。
Marcus早前為計劃搞咗個頒獎禮，佢曾任電視主播嘅太太劉明軒（Vivian）、父親及胞妹齊出動，唔少政商名人都有捧場。卓妮仲發現音樂唱作人雷頌德、歌手許志安及蘇永康都在場，原來佢哋係有關計劃嘅創會理事，去年Marcus籌款成立計劃，三人即拍心口支持。其中蘇永康去年捐咗五萬元支持計劃，今年更「加碼」捐十萬元。
卓妮仲見到仁愛堂前主席張心瑜，原來佢出任有關計劃嘅永遠名譽會長。祖籍南京嘅佢，多年來對家鄉慷慨捐獻，並一直都想成立個人慈善基金，今次佢睇見Marcus搞傲翔計劃咁成功，於是決定向對方取經，希望盡快實踐成立慈善基金嘅目標。
卓妮