政情：胡國興退休變百彈齋主

美國中央情報局前特工斯諾登大爆美國秘密監控事件，惹來全球關注，連久未露面嘅胡國興都有留意，佢仲趁此機會大讚香港係最安全地方，因為本港有《截取通訊及監察條例》，法例本身參考英國等多個國家而制訂，反而英國周街都係閉路電視，疑似寸爆英國監控情況嚴重。

佔中陽謀 何懼勾線？

胡國興其後又大爆「截聽秘聞」，佢話有時截聽都好悶，事關佢在任截取通訊及監察事務專員期間，有份覆檢執法部門嘅截聽內容，試過聽咗兩、三個小時都無特別，其中有次較為特別嘅係，聽到有疑似疑犯打電話畀二奶喎。

未知胡國興係咪無官一身輕，之後愈講愈興奮，連佔中及七一遊行等較為敏感議題都有觸及。對於有支持佔中人士曾自爆手提電話有怪聲，懷疑被人勾線竊聽，佢相信無乜可能，因為查實佢哋清晰講咗會有咩行動。佢又笑笑口話，其實佢個電話都無乜勾線價值，因為佢主要係打電話畀家人喎。

反問七一「有冇平鮑魚」

今年七一遊行疑似係佔中預演，加上歷來七一遊行都會霸佔多條行車線，最近搬屋至新界北嘅胡國興對於當日行程疑有腹稿，佢笑言當日下午最好唔去銅鑼灣，但之後又自爆獲邀出席七一升旗禮，換言之都係要「過海」。

講到當日有建制派工商團體聯同千多間商舖搞購物優惠日，問胡國興會否有興趣去「執吓平嘢」時，佢此時先好似如夢初醒得悉有呢個活動，又反問：「有無平價鮑魚賣先？」連佢都對優惠日唔多清楚，睇嚟有關嘅主辦單位要加把勁，做好宣傳工作喇！