中環出更：愛女畫出中國夢 李秀恒忙推介
中華廠商聯合會副會長李秀恒（Eddy）嘅愛女李楚洳（Samantha），大學未畢業已開辦個人畫展，早前更喺比賽中獲獎，尋日仲獲邀參與一個畫展，出動一幅名為《中國夢》嘅大型畫作，夠晒搶鏡。Eddy話，Samantha大個女喇，希望佢憑自己力量去完成理想。話就咁話，愛女心切嘅佢始終忍唔住出手，落力推介好友觀賞愛女嘅作品，似足藝術導賞員。
兒時玩意成作品靈感
今次Samantha傾力創作嘅呢幅《中國夢》，由多幅中國及香港重要事迹嘅照片拼貼而成，並以數條巨龍串連起來。佢解釋，作品主題「中國夢」係寓意大家有共同嘅夢，而中國人又稱「龍的傳人」，所以作品當然唔少得龍嘅存在啦！至於Samantha嘅創作靈感，原來係來自佢兒時玩嘅棋盤遊戲Snake and Ladder（蛇與梯）。
卓妮同場仲見到退休近一年嘅前駐京辦主任曹萬泰，佢對展覽場嘅展品甚感興趣，凝神觀賞之餘，更用手機影相。佢話退休後四處遊埠，但同駐京辦嘅舊同事都有保持聯絡。佢仲透露，依家閒時仲會為香港大學嘅師弟同師妹提供意見喎，唔知佢會唔會考慮客串做埋教授呢？
「蘭桂坊之父」兼海洋公園主席盛智文都有去湊熱鬧，佢一見到協成行集團主席方潤華，就傾到雞啄唔斷，二人不時笑到四萬咁口兼搭晒膊頭，莫非佢哋傾緊投資物業？
卓妮