政情:功夫茶文化 「松」潮州人說起

中國茶道文化博大精深,例如潮州人嘅功夫茶,不但講究泡茶技巧,亦係傳情達意嘅工具。據潮州商會會董胡炎松所講,潮州人愛以茶奉客,客人只要留意對方嘅舉措,自己嘅印象分有幾高從中亦可略知一二。

胡炎松日前喺一項簽約儀式中,向在座賓客介紹功夫茶文化,佢話潮州人傾生意,通常都係「飲啖茶,慢慢傾」。然而好多人大惑不解嘅係,茶杯嘅數量永遠比在座人數要少。佢話咁做嘅目的係要分配不均,從而達致賓客之間互相謙讓,能夠獲得對方「讓出」茶杯嘅客人肯定覺得倍受尊重,從而營造融洽嘅傾談氣氛。

茶質厚薄無異喻一視同仁

至於斟茶方面亦好講究,務求每杯茶嘅茶質皆厚薄一致,代表一視同仁咁話喎。至於茶葉,往往又反映潮州人對來客嘅重視程度。胡炎松話,一見有客來訪就馬上更換壺中茶葉,意味視客人為上賓,並將以珍藏茶葉奉客。反之,大家傾談良久,杯茶愈飲愈淡都無意更換茶葉,即暗示對方唔想再「嘥口水」,客人遇上咁嘅情況就要知情識趣喇。

第一手消息請下載on.cc東方互動iPhone/iPad/Android/Windows Phone Apps