中環出更：新社聯籌款宴大玩棟篤笑

當晚最少有五至六個環節，最精彩就係新社聯理事長陳勇同立法會漁農界議員何俊賢（高佬賢）嘅棟篤笑，聽聞佢哋事前冇練過，全部即場爆肚。

陳勇何俊賢爆肚靠身高

高佬賢不斷呻苦，話自己生得高，細個要打斜瞓，依家就要訂造床。而陳勇就話向來唔敢企喺高佬賢隔籬，但係睇完拿破崙傳及鄧小平傳之後，當堂自信返晒嚟喎，估唔到作為港區人大新丁嘅陳勇竟夠膽搵已故國家領導人嚟開玩笑，莫非佢唔怕被訓話？

龔中心（左）及龔因心（右）出席新社聯晚會，列席台上做嘉賓。（何天成攝）

高佬賢（右）刻意企低兩級與陳勇合照，相當搞笑。

不過，長得高唔係高佬賢嘅專長，同樣好高嘅港區人大代表姚祖輝（Andrew），一見到高佬賢就即時度高，仲笑住話搵埋陳勇一齊影相添！講開人大代表，各代表以往都要輪流去北京列席於全國人大常委會會議，Andrew透露，嚟緊十二月會有常委會會議，但暫時未接獲通知，但佢話如果其他港區人大唔想聖誕節冇假放嘅話，就等佢捱義氣去列席喎，到時當係帶埋家中小朋友一齊過一個白色聖誕咁話。

另外一個環節係由早前贏咗觀塘區議會坪石選區補選嘅陳俊傑，聯同該區前議員、商務及經濟發展局政治助理陳百里Jam歌。原來陳俊傑係音樂能手，修畢音樂文憑，主修鋼琴，副修結他，依家仲不時會作曲添，咁佢喺地區搞活動咪可以慳番筆唔使請樂隊囉？

卓妮