中環出更：王賢訊夫婦 自家公仔助籌款
慈善機構籌款，最緊要有橋。仁濟醫院副主席王賢訊（Vincent）就有妙計，佢正籌謀將太太朱穎詩（Vincci）新書中嘅可愛主人翁，同仁濟醫院嘅年度曲奇義賣玩Crossover，免費將壽星公、神仙狗及灶君等得意公仔，印製喺曲奇鐵罐上。Vincent笑稱，呢班主角取材自中國神話故事，夠晒如意吉祥又深入民心，希望到時可以吸引一批鍾意收藏鐵罐嘅公公婆婆粉絲。
朱穎詩想專心寫作
Vincci及Vincent去年齊齊躋身作家行列，Vincci嘅神仙狗故事書好受歡迎，出完一本又一本。Vincci話，七月書展將會推出第四本，到時仲會推出一黑一白嘅公仔咕o臣助陣。由於佢哋嘅出版事業愈來愈大，Vincci透露，下一步計劃係搵寫字樓，以便處理公務及寫作。事關佢依家喺屋企一邊湊女，一邊寫書，卻經常被囡囡打斷，希望到時可以享有片刻寧靜，專心創作，暫別全職師奶作家嘅生涯。
卓妮