中環出更：甘草演員遊立會羅蘭「龍婆」上身
香港演藝界人才輩出，唔少演員閒時更會為慈善團體做義工。尋日下午兩點鐘，卓妮見到演藝界幾位甘草演員出現喺立法會會議廳二樓公眾席，當中包括飾演「龍婆」出神入化嘅羅蘭、梁舜燕及黃韻材（原名黃允財）等。正當大家苦思幾位演藝人同立法會嘅關係時，原來佢哋係應鐘聲慈善社同保險界議員陳健波嘅邀請參觀立法會。
「批」灰牆唔順眼 似前途灰暗
七十八歲嘅羅蘭從影超過半世紀，多年來主演電影劇集不下一百套，更曾憑住精湛嘅演技勇奪香港電影金像獎最佳女主角。羅蘭尋日戴頭箍、身穿碎花上衣低調現身立法會，當導賞員逐一介紹大樓各景點，羅蘭除咗細心欣賞眼前建築，仲主動企喺前排細聽大樓嘅故事。
羅蘭笑言，佢出入片場、戲棚就多喇，但參觀立法就真係人生中第一次。佢話，雖然立法會大得超乎想像，但就覺得大樓用色過於簡樸沉實，唔少牆身更加塗上灰色油漆，驟眼睇令人感覺「好灰」，好似前途一片灰暗。佢建議立法會改用米黃等比較暖和嘅色系，相信會更加順眼。「龍婆」出到聲，立法會真係要考慮吓喇！
鐘聲慈善社社長蕭思敏透露，慈善社經常邀請黃韻材、梁舜燕等資深演員出席該會每月舉行嘅長者聚會，同一眾老友記閒話家常。黃韻材當年因喺劇集《陸小鳳》中扮演花滿樓一角而廣為人知，現時佢每年會喺新光戲院舉辦名為「友情有愛」嘅個人演唱會，將籌得善款全數捐出幫助長者之餘，不時仲會出席慈善社活動唱粵劇曲。
陳健波透露，佢同蕭社長因工作關係結緣，自此對方就不時向佢介紹慈善社工作，又邀請佢為慈善社活動擔任主禮嘉賓。陳話，見到唔少演藝界人士願意抽時間行善，令佢深受感動，於是就邀請佢哋去立法會午膳及參觀，當係答謝佢哋為慈善社嘅貢獻。
卓妮