政情：神打抽水列文化遺產？
「非物質文化遺產」係啲無形嘅遺產，可以係表演、表現形式、知識或技能。尋日立法會民政事務委員會就討論香港嘅非物質文化遺產嘅建議清單，向來語出驚人嘅鍾樹根（樹根）又有新作，佢建議道教嘅扶乩及破地獄儀式、神打、問米等神怪迷信嘅傳統都應該加入清單，佢仲竟然連非法嘅三合會入會儀式都建議保存，總之講到天花龍鳳，笑料百出。
樹根倡保存「扶乩」
正當其他議員建議緊將辛亥革命、海員大罷工等事件列入香港嘅非物質文化遺產清單嘅同時，樹根亦提出水蛇春咁長嘅「騎呢」建議，例如道教嘅「扶乩」占卜問事、喪禮上嘅破地獄儀式，佢覺得係蔚為奇觀，應該保存。之後佢又話自己睇過神打，見到啲人搵刀「捅」自己都冇事，又好似為齊天大聖賀壽做嘅「上刀山」儀式咁，亦都好蔚為奇觀，都應該保存咁話。
樹根講到興起，口若懸河咁再提多幾個建議，話「問米」（與鬼魂通靈）係香港特色，鵝頸橋底「打小人」都係香港獨特文化，覺得同樣可以加入清單。最後佢仲竟然大大聲話：「三合會入會儀式都好特別」，問大家係咪覺得應該保存。不過，佢講完都驚自己講錯嘢，後來笑笑口補番一句話：「唔知保存咗會唔會犯法呢？」其實唔使問都知道係犯法啦！
慢必撐「打小人」
不過，樹根發表完偉論後，似乎都冇乜人理佢，反而作為對家嘅人民力量「慢必」陳志全搭嘴話，支持樹根建議將「打小人」納入非物質文化遺產喎。慢必之所以撐樹根，原來都係為咗撐自己，事關佢之後入正題話，自己都曾出錢出力搞過幾次大型打小人活動喎。
慢必賣完膏藥之後，工業界林大輝就寸爆話：「咁『抽水』都係非物質文化遺產啦！」即係寸爆慢必示範向樹根抽水，此話令到大家都笑騎騎。大家睇到呢度，係咪覺得班議員好無聊呢？