占士教壞細路捱轟
力爭生涯第二冠的「大帝」勒邦占士（LeBron James），日前被美媒踢爆於夜店潮用G-Pen扯煙，認真唔要得！占士場外曳曳但場內就交足貨，昨晨於總決賽Game4翻生大爆發攻入全場最高的33分，季後賽得分超越「夢中人」奧拉祖雲（Hakeem Olajuwon）之餘，更率領熱火作客以109比93力挫馬刺，總場數扳成2比2平手，莫非「大帝」靠支「筆」翻生，愈扯愈醒神？
據美媒《Terezowens》爆料，占士於Game4前夕不單止流連夜店，更被狗仔隊目擊使用G-Pen吞雲吐霧。不少歐美G-Pen用家都喜歡透過這種吸煙工具服食大麻，據知情人士向美媒稱，「大帝」其實只吸食煙草，不過身為職業運動員，煲煙已有違操守，有美媒更批評該位熱火球星做壞榜樣，擔心年輕球迷有樣學樣。
季後賽得分王升第9
頭三場總決賽表現大為走樣的占士，扯爆煙後反而愈打愈有，昨仗25射15中貢獻33分、11個籃板球及4次助攻，當中第3節兜口兜面Block爆鄧肯（Tim Duncan）一幕更屬全場高潮所在，加上「三巨頭」合力轟入85分，熱火終以16分之差大勝馬刺，總比數扳成2比2。贏波功臣占士全場攻入33分，累積以3,777分超越名宿奧拉祖雲（3,755分）及夏利錫（3,776分），躋身聯盟史上季後賽得分王第9位，「大帝」賽後表示：「我不斷睇番Game3嘅重播，激勵自己要搵馬刺復仇，今日我做到啦！」
酒吧冧平台 逾百球迷墮海
熱火贏波Fans照計歡天喜地，不過昨日於比斯坎灣一間酒吧睇直播嘅熱火球迷就認真唔好彩。由於酒吧嘅露天平台不勝負荷突然倒塌，大約100位熱火「粉絲」全部跌晒落海，慶幸水深僅1.5米，大部分球迷都能游番上水面，消息指意外共有24人受傷，其中3人情況嚴重。
本報綜合報道