政情：朱曦大擦水果解鄉愁
台北經濟文化辦事處處長朱曦來港上任唔係好耐，但已經思鄉心切，啱啱返咗老鄉台灣度假兩天。尋日佢出席港澳台灣慈善基金會「愛心獎」活動時話，每次回鄉，最掛住嘅就係當地又甜又大嘅水果，今次趁住蓮霧同芭樂（番石榴）當造，當然要食個夠本啦！
為龍舟比賽秘密練兵
朱曦話，雖然香港都有賣台灣水果，但同台灣出產嘅完全係兩回事，事關香港賣嘅水果就算標明「台灣」字眼，都未必係台灣種植，有啲甚至只係台灣品種。就快到端午節，朱曦話會再接再厲參加扒龍舟比賽，現正秘密練兵。佢笑言，大學時期做得最多嘅運動係打麻雀，依家就愛打籃球，難怪佢咁fit喇。
自從內地人來港個人遊，香港店舖種類偏向單一化，滿街都係珠寶鐘錶店、金舖、化妝品店，問朱曦怕唔怕台灣開放內地個人遊後，會步香港後塵？朱曦就話唔擔心，皆因台灣出名多文化創意產品，又有大量特色土產食品、電子產品，佢相信呢啲本土特色會比名牌貴價品更有吸引力喎。