政情：諷海洋公園搵庫房提款 陳智遠嘆香港又輸畀星洲
陷入財困嘅海洋公園要求政府注資救亡，仲話一旦拎唔到撥款，公園只係能夠營運多一個月咁話喎。曾任食物及衞生局政治助理、依家主力發展深度遊業務嘅陳智遠（Paul），尋日就喺Facebook（Fb）貼文同朋友討論呢件事，仲援引新加坡一個同樣係由政府主導嘅公園，質疑點解人哋可以打出一片天，但海洋公園就經營到差強人意，蝕到要當庫房做提款機？
星洲經營公園一年好過一年
查實好多市民都好不滿，明明海洋公園曾經連續十幾年都有盈利，但管理層易手後就接連錄得虧蝕，所以阿Paul喺Fb貼文開首話，係咪應該注資畀海洋公園救亡，大家都心裏有數。
阿Paul之後就講起香港主要競爭對手新加坡，指當地有一個以生態旅遊為主打嘅知名公園「Gardens by the Bay」，佢仲仔細研究呢個公園嘅營運模式同財政結構，指該公園嘅營運一年比一年好，每年訪客人次超過一千萬，財政非常健康。到最後佢都不禁大嘆，點解我哋香港嘅海洋公園就經營到差強人意，蝕到要當庫房做提款機？