政情：今日你上鏡：學星爺講電話
以前中環舊立法會大樓，議員講電話都會行出會議廳，但現時新大樓議事廳大得多，主席好難（目及）實議員做緊乜。班議員於是乘機作反，有人大搖大擺咁講電話，但班新議員就冇咁放肆，好似金融服務界張華峰，佢就伏喺枱面扮瞓覺咁講電話，十足電影《逃學威龍》周星馳考試時伏枱面偷偷講電話出貓咁款，但以峰哥直逼五十吋嘅腰圍，伏低身講電話嘅難度相當高。講開峰哥，佢有份搞嘅證券及期貨專業總會，非常不滿財經事務及庫務局局長陳家強早前喺立法會對峰哥動議嘅回應，並要求佢收回言論，呢個做法非常罕見。（霍振鋒攝）
