搵保鏢暗中跟到實補鑊
「華武」爸爸起初以為個仔悶悶哋貪玩，搵個保鏢暗中跟蹤，後來先發覺，阿仔已養成習慣，而且偷嘅都唔係值錢嘢，知道後當然嬲到震啦！不過，「華武」咁大個人，唔通困住佢唔畀佢出街咩，為免阿仔遲早淪為階下囚，惟有請保鏢「護駕」，每次見到公子手痕，轉頭就塞錢畀店員幫手埋單，咁就唔算盜竊喇。
不過，咁補鑊法始終治標唔治本，萬一保鏢睇漏眼，一定出事。爸爸於是游說「華武」去睇心理醫生，一來希望醫好個怪病，二來叫醫生寫定張紙，證明阿仔有病，就算他日畀人當場捉住，大可以攞張醫生紙出嚟當「護身符」。原來醫生紙可以咁用嘅，世事真係無奇不有。