叫得專業人士本來係信心嘅保證，講句說話都擲地有聲而且多啲人知，但正所謂「樹大總有枯枝」，原來亦有人虛有其表，講緊嘅係某位假名「牙斬斬」嘅專業人士，因為聽聞佢女伴多到數唔晒，又成日都攀附權貴，最近靜極思動更加將目光放在中港範疇，密密「搞關係」密謀「升呢」做全國政協委員。
呢位「牙斬斬」打扮好光鮮，人前人後都係幸福家庭嘅模範，但事實上只係一個幻覺，皆因原來佢其實除咗老婆外仲有好多女伴，佢同老婆嘅恩愛場面只限於仔女或者場合需要，兩公婆嘅溝通一早就係「有限公司」。除此以外，「牙斬斬」仲不務正業投機鑽營，不時以專業人士身份自居，四處標榜佢同政商名流有幾熟，講到尾都係想沾吓光等人哋對佢「尊敬三分」。
本來人望高處都係人之常情，但據聞「牙斬斬」對於目前擁有嘅嘢仲未心足，對做政協呢件事流晒口水，四處求人推薦佢畀機會佢上位，搞到平時同佢有接觸嘅政商界人士都好無癮，一係當耳邊風聽咗就算，一係就喺朋友聚會時私下「唱衰佢」，難為「牙斬斬」仲自我感覺良好，唔知好嬲定好笑。