中環出更：鄭錦鐘夫婦歎一星中菜
日前新一期米芝蓮指南出爐，推介二百四十多間香港食肆，其中位於紅磡海名軒嘅中菜餐廳「玉蕾」，新上榜摘下一粒星美譽，即時聲名大噪。保良局副主席鄭錦鐘（Eric）早前就拖埋太太慕名而來，大歎紅白美酒配精緻中菜，大飽口福之餘，仲跟隨世界排名第四嘅日籍品酒師野坂昭彥，參觀餐廳內價值二億元嘅酒窖，大開眼界。
曾經跟過國際知名酒評家Robert Parker（RP）學習品酒技巧嘅Eric，當日點咗七道菜嘅wine tasting菜單，由日籍大廚操刀，特別有心思。一道香炸大閘蟹蓋，蟹肉同蟹膏比例剛好，入口鮮嫩滑溜。另一味窯烤煮松子肉，做法似乞兒雞，將肥美豚肉以荷葉及厚鹽蓋住，荷葉香氣逼人，豚肉鬆化甘香。每道菜分別佐以不同佳釀，由清香白酒漸進至濃郁紅酒，其中一支來自美國Napa Valley嘅DuMOL Aiden Pinot Noir2009，RP評分高達93分，年產只有四千支，入樽時刻意省卻隔渣程序，令酒香更豐腴誘人，享用前雪凍五分鐘風味更佳。
玉蕾行政總廚今川幹也話，日籍餐廳老闆對室內設計及食材都一絲不苟，好似有一道「清酒煮花螺」，堅持要用上乘清酒入饌，支清酒成本要六百幾元，只能煮出每碟一百多元嘅花螺，可謂不計成本，體現對食材嘅一份堅持。
欣賞天價美酒
食完飯，Eric順道欣賞餐廳優雅環境，更驚嘆二億酒窖內裏收藏咗大批珍貴名酒，包括多支來自法國布根地嘅ROMANÉE-CONTI，估值十多萬元一瓶，連RP都評語為「億萬富翁才喝得到的酒」。
Eric下屆將接棒做保良局主席，佢話依家正密鑼緊鼓，籌備一連串預備工作，呢頭物色活動場地，另一邊廂又要計劃籌款大綱，期望到時交一張漂亮嘅成績表畀大家。
卓妮