政情：CY夫婦正式搬入禮賓府
特首梁振英（CY）當選後一直住番喺山頂貝璐道裕熙園大宅，等待禮賓府裝修完畢後，先正式入伙。等咗近四個月，CY兩夫婦尋日終於名正言順入主禮賓府，但根據政府新聞處公布嘅資料顯示，原來禮賓府嘅定期維修及翻新工程仲未完成，預計今年十二月先可以全部搞掂。其實我哋之前都講過，禮賓府發現有多處嚴重漏水，落大雨時更要搵大桶接水，情況都幾嚴重。
咁CY揀尋日搬入禮賓府，究竟係咪好日子呢？堪輿學家蘇民峰話，尋日日子同CY生肖冇相沖，建議最好換埋大門，因此舉等同重新入伙，可以改善地運。蘇師傅贈多兩句，建議CY可以考慮喺禮賓府中間放置火爐，事關中銀大廈外形就好似把劍咁，火爐可以「煉劍」，咁樣可以聚氣。
另一堪輿學家麥玲玲亦話，尋日日子「中吉」算係唔錯，但禮賓府未裝修好，就要小心影響健康及夫妻間多拗撬，最好盡快完成裝修工程；至於CY搬入禮賓府居住，可以令權力更集中，有利民望咁話。不過，堪輿學家李丞責就話尋日不利搬遷動土嫁娶，事關月份同年份相沖，但相信為官者可以駕馭喎。聽過三位師傅贈言，唔知CY信唔信呢？