如果話善變呢樣特質係政治人物嘅「專利」，應該無人反對。曾經形容政務司司長（CS）林鄭月娥係「妹妹」、話唔想做妹妹下屬嘅新民黨主席葉劉淑儀，自從再次進身行政會議成員後，即刻同妹妹老友番，尋日去埋山頂白加道CS官邸同妹妹食晏，仲影埋相事後放上網添，感情好到似足兩姊妹咁，真係大開眼界。
但葉太喺社交網站嘅留言，唔再用「妹妹」來形容林鄭，而係用「舊同事」嚟稱呼對方，仲話二人過咗個好溫馨嘅一小時，三餸一湯有蒸魚又有咕嚕肉，食完仲歎埋杯茶至走，睇怕兩人以行動粉碎外間話佢哋不和嘅謠言，呢次算唔算係一飯泯恩仇呢？
講起葉太，佢相隔九年後重返行會，覺得最大改變係保安系統都嚴謹好多，佢記得○三年開會時都冇乜保安要求，但依家就要喺開會前先將智能電話交畀行會秘書處保管，佢話以防人偷聽、偷錄、甚至引爆炸彈喎。雖然闊別行會多年，但原來佢唔使再次宣誓，因為九年前做保安局局長時宣誓咗，保密已經係終身責任，無論離開官場幾多年都依然生效。