政情：架構重組唔成因禍得福

新政府架構重組方案，係由現時三司十二局增加兩個副司長及兩個局長，相信處理問題會更有效率。不過，回想呢個方案由提出至今，面對困難重重，政府喺上屆立法會動議優先審議架構重組方案，結果被泛民主派批評為打尖，又認為推出方案不必急於一時，最終欠缺新民黨葉劉淑儀嘅關鍵一票，令方案打尖不成。雖然葉劉當時被千夫所指，有人亦話佢激嬲咗有關方面，因而無望入行會，但點解最後佢又入到行會呢？

原來事實並非如此，有政界人士透露，有關方面話好彩當日葉劉冇投贊成票咋，否則方案經過審議同最後通過埋，政府都唔知可以搵邊個出任新增嘅職位。早前仲有傳聞話，政府會派現任發展局局長陳茂波出任政務司副司長，而著名眼科醫生何志平就出任財政司副司長，民政事務局副局長許曉暉就擔任文化局局長等等，但難以排除當中部分人士好似前發展局局長麥齊光咁出現負面新聞，打擊政府管治威信。

更多時間推利民措施

再者，喺依家呢個火頭四起兼不斷撲火嘅政治環境，整多個高官等於為反對派增加多個箭靶，所以有關方面認為按兵不動維持原有架構會較為有利，仲好慶幸話架構重組方案冇喺立法會通過，否則當局只會變相為自己埋下炸彈，添煩添亂，反而依家有更多時間兼顧及推動更多利民措施。話時話，負責架構重組方案嘅政制及內地事務局局長譚志源，回想今次架構重組方案一波三折後暫時擱置，唔知會否感覺一額汗呢？