新婚鴛鴦 合葬續塵緣

母憶愛女「每次都喊」

「佢哋生前好恩愛，一定會將佢哋合葬，至於地點同細節，我哋兩家人仲傾緊。」昨午女死者劉文麗的父親劉先生接受本報電話訪問時，憶起愛女往事，仍語帶激動表示，「佢哋兩公婆份人好簡單、低調，就算結婚都唔想大搞，只係擺幾圍枱，自己兩家人食飯就算。」

劉父續指，文麗尚有一名已婚姐姐文鳳，育有一對子女，一家人關係融洽，豈料一夜間竟痛失孝順女，家人至今仍難以接受女兒罹難的事實。「個女（文麗）由細到大都好乖，好孝順，性格好純，大家都好錫佢，真係好難接受。太太情緒仲係好唔穩定，每次諗番件事都會喊。」