問︰特首選舉時有你嘅支持者捐咗錢畀你，仲特登喺支票背後寫「支持何俊仁」，點解冇申報﹖
答︰係咩﹖我唔覺。
問︰有個捐咗一千零八蚊，另一個喺你競選網站捐，但連結咗去民主黨捐款網站……
答︰呢啲……我就冇收過啲人直接捐款畀我，或者捐咗款話畀我嘅特首選舉。我冇收到咁嘅嘢。如果有嘅容乜易報啫，冇緊要o架。但係佢一定要話畀我聽佢係邊個，呢個好重要，唔能夠唔話畀我聽佢係邊個o架嘛，你明唔明呀﹖
問︰人哋支票同網站捐款都有名o架喎……
答︰如果有名更加要話畀我聽囉。你唔話畀我聽點知道啫。你知我哋街頭籌成百幾二百萬嘅捐款。你突然間有啲現金、有啲支票擠入嚟又唔講清楚，真係唔知道o架，啲人入咗都唔知咩事。
問︰佢支票有自己名，佢捐款嗰陣……
答︰佢支票有自己個名唔等於嗌你公開，好多捐款捐畀政黨係唔公開，捐畀我通常寫我個名，唔會畀民主黨，通常捐畀我寫我名。
問︰佢哋見你四月冇申報，問我哋點解冇……
答︰我唔知道，你嗌佢搵我，我唔知有咁嘅事。如果佢係支持我嘅，應當時同我講嘛。
問︰點解你嘅競選網站捐款嗰度要直接連結去民主黨網站﹖會唔會令捐款混淆咗，分唔開邊啲係支持你嗰啲呢﹖
答︰我要睇番。你依家咁問我呢，我完全都冇過問過半點個競選網站嘅嘢。如果真係咁嘅情況我要搞清楚。佢係咪真係捐畀我、係咪願意公開，呢啲重要o架，要搞清楚先得囉。
問︰點解唔另外設個銀行戶口為支持你競選呢﹖唔使連結去民主黨o架﹖
答︰我唔係好記得有特別為呢樣嘢籌款喎。我睇番。
問︰咁會唔會知筆帳目？收到幾多係支持你？
答︰我唔知喎，都唔知道有，查清楚先講。