傳統智慧話畀大家聽，香港夏季大部分時間吹西南風，空氣比較潔淨，理論上見到藍天白雲嘅機會相當高。之但係大家又有冇留意到，今年夏季特別天昏地暗又熱到跳舞？冇耐前之嘛，颱風蘇拉掠過期間，天氣持續酷熱兼且空氣污濁不堪，天文台錄得跑馬地同黃大仙氣溫高達攝氏三十七度，環保署三個路邊監測站錄得空氣污染水平甚高，中環嘅空氣污染指數達到驚人嘅二百一十二嚴重水平。
因乜事幹香港嘅空氣質素差得咁交關嘅呢？中環錄得嘅二百一十二空氣污染指數，僅僅低過二○一○年內地沙塵暴襲港咋。維港上空嘅懸浮粒子，已經成為國際新聞，《華爾街日報》形容香港人出街都要以手掩面，仲話香港已經成為中國第二嚴重空氣污染嘅城市。
環保團體地球之友比較過香港同新加坡嘅情況，結果得出一個結論，香港又輸畀呢一個長期競爭對手，好似被摑咗一巴咁瘀皮。新加坡政府宣布，二○二○年採用世界衞生組織最嚴格嘅管制標準「空氣質素指引」（AQG），規管大部分空氣污染物，包括世衞最近認定為致癌嘅「可吸入懸浮粒子」（PM10）。地球之友就話嘞，香港同新加坡一樣喺○九年檢討「空氣質素指標」（AQO），但係新加坡冇只顧經濟發展而忽視空氣污染帶來嘅健康威脅，促請特首梁振英信守競選承諾，以更快捷嘅行政手段代替立法程序，盡早更新空氣質素指標，保障市民健康同經濟競爭力。
前特首曾蔭權被稱為「氣候逃犯」，在位七年乜都冇做，藍天行動爛尾收場，家陣執咗包袱落咗台更加逃之夭夭唔知去咗邊，新特首係咪應該撥亂反正呢？原則上當然應該啦，之但係有一個問題比較頭痕，新官上任嘅環境局局長黃錦星似乎避重就輕，上任以來多次公開發言之時，只係重點提出垃圾減廢，較少談及如何應付空氣污染。健康空氣行動已經建議過，環境局應該大刀闊斧改善空氣質素，包括淘汰舊商業車輛、更換高污染巴士、設立低排放區等等。可惜吖，黃局長冇乜反應，有理由相信係傳奇人物聾耳陳上身。
又話民生無小事？空氣質素關乎全人類嘅民生福祉，如果一出街即刻窒息死，畀你搵多多錢都係假啦，吓話！
計功夫茶話齋，改善空氣質素真係輸唔起o架，否則輸家就要攬住一齊死。至於氣候逃犯，走咗就唔好返轉頭嘞，麻煩梁特首千祈唔好淪為氣候逃犯二號，向新加坡急起直追啦唔該！