政情：嫻姐KK做實習侍應甩漏多
冬菇亭大牌檔可以話係香港嘅本土特色，參選立法會嘅工聯會陳婉嫻同黃國健（KK）尋日就去咗黃大仙下邨冬菇亭食肆，話要透過自己做實習侍應去令政府關注本土經濟發展。不過，佢哋兩個飲食界新丁都被食客考起，嫻姐落單時將啲食物寫到水蛇春咁長，慢吞吞咁，而KK就唔識幫阿婆落單，雖然做到甩甩漏漏，但老闆都畀八十分，認真好人。
話說有食客叫油炸鬼，嫻姐落單時就寫晒成個食品名，搞到要KK提佢︰「寫個鬼字得o架喇！」不過，最搞笑係嫻姐寫得太工整，大廚反而睇唔慣，反問「咩嚟o架？」咪以為KK提嫻姐就好醒，佢都畀阿婆考起，皆因KK問個阿婆食咩時，阿婆竟然話唔知，搞到KK手足無措。原來婆婆係熟客，次次都係侍應阿姐幫佢揀食物，所以最後都係要阿姐落單。咁啱得咁蹺，民主黨胡志偉拉完票去冬菇亭食嘢，好彩嫻姐同KK已經收工，否則就要幫胡志偉落單喇。
九龍東參選名單仲有陳鑑林、謝偉俊、梁家傑、譚香文、陶君行、嚴鳳至、黃洋達。超級議席名單就仲有何俊仁、涂謹申、劉江華、李慧琼、馮檢基、白韻琹。