特首辦公室日前被指曾發出一封「密函」電郵畀多個私人機構嘅主管，解釋國民教育科唔係「洗腦」工具，被外界質疑打文宣戰，暗中向機構高層施壓，要佢哋力撐政府推行國民教育科，但原來大家可能對事件敏感咗喇。
我哋尋日再向特首辦求證事件，特首辦話為釋除大家嘅疑慮，再提供一個更詳盡嘅解釋。原來特首梁振英（CY）喺競選特首期間，為加強同各界接觸，問咗好多人介唔介意提供私人電郵，以接收佢嘅資訊，總共收集咗四位數字嘅電郵帳號。
特首辦話，政府因應有關人士希望更了解CY嘅政策，所以善用手頭上嘅資料庫，發出推廣政府政策嘅電郵。如果有關人士唔想收到特首辦電郵嘅話，可以選擇拒絕接收電郵。話時話，或者特首辦可以趁呢個機會更新現有嘅資料庫，都未嘗唔係好事吖。