政情：陳茂波偷步做發展局長？
會計界立法會議員陳茂波（Paul）因架構重組觸礁而冇得做財政司副司長後，最近盛傳佢會轉任發展局局長，頂替因租津風波辭職嘅麥齊光。
尋日有團體發出新聞稿，指阿Paul剛以「發展局」名義同一班青年人交流會面，但中央都未任命喎，咁快就偷步上任，落區熱身？原來係有人張冠李戴，誤會一場。
新聞稿指出，阿Paul日前以「法律援助發展局」主席身份，喺一間甜品店同大約四十位青年人交流法援問題，又話多名與會青年都特登點咗「梁粉」嚟食，以示支持阿Paul呢位忠實嘅特首梁振英粉絲。最後仲好趣味問及，唔知阿Paul會否由「法援發展局」過渡到「發展局」呢？不過，其實法援局嘅全名係「法律援助服務局」，莫非主辦團體早已認定阿Paul將會出任發展局局長，因而搞錯佢個職銜？