政情：批准貪曾豪遊 甯漢豪照升官
審計署早前揭發貪曾瘋狂外訪，貪盡全球，其中負責批准貪曾入住超豪總統套房嘅，正係前特首私人秘書甯漢豪。政府尋日公布，甯漢豪將於本月起升任地政總署署長。咁樣濫用公帑法都有得升官，再次證明公務員嘅升遷賞罰制度，絕非一般小市民所能理解。
甯漢豪現年四十八歲，八九年加入政務職系，曾任職前政務總署、前新機場工程統籌署、前公務員事務科、前教育統籌局、財經事務及庫務局等，再加上曾任貪曾嘅私人秘書，全部都係接近權力核心嘅重要職位，可見政府幾咁重視同栽培佢，今次升官其實唔令人意外。
雖然甯漢豪喺貪曾外訪一役備受批評，但亦有唔少公務員同佢講好話，聲言係公務員都知貪曾專權同貪小便宜，甯漢豪作為下屬，唔鬆手批准貪曾入住總統套房，將來一定冇運行。人在江湖，身不由己就係咁解喇！