上任無耐嘅特首梁振英（CY），好快就要接受議員嘅質詢，事關佢下星期就出席立法會答問大會，回應自己間山頂大宅嘅僭建風波。可能佢驚唔熟路，尋日特登去咗立法會一趟視察環境，發現條進出路線都無咩問題。不過，秘書處就好細心，將佢個發言架（podium）校高啲，無端端點解要校高呢？咪因為之前貪曾實在太矮囉。
CY為咗做足準備，連睇場視察都係親力親為，尋日佢特登帶埋幾位保護要人組人員，到立法會睇環境，睇吓有咩要改動。CY睇咗五分鐘唔夠就離開，無向秘書處提出乜嘢特別要求。
之所以咁順利，原來秘書處一早做定預備工作，早上已經派一個同CY差唔多高度嘅人做綵排，仲校高個podium，以免CY要烏低身睇稿，做到完美先至等CY收貨。
CY去立法會之前，先去迪士尼樂園主持灰熊山谷開幕禮，但儀式一完就迅速離開，無試坐山谷列車，唔通擔心刺激得滯？