政情：邵善波領導中策組
發展局局長麥齊光因捲入互租單位事件遭廉政公署拘捕並辭職下台，令外間對入官場前嘅品格審查係咪萬無一失存疑。據聞梁班子嘅中央政策組（中策組）首席顧問職位之前懸空近兩星期，箇中原因亦同品格審查工作較遲起步有關，但最後都只係虛驚一場，事關港府尋日宣布正式委任邵善波做中策組首席顧問，結束中策組呢個短暫嘅真空期。
香港一直欠缺產業政策，特首梁振英（CY）喺競選特首期間試圖撥亂反正，提出「官產研學」嘅概念，政圈一早預計CY上場後，負責公共政策研究工作嘅中策組角色將十分吃重。不過，較為奇怪嘅係，直到CY七一正式上任，中策組嘅核心人物包括首席顧問及三個全職顧問都懸空，只有本身係政務官出身嘅葉文輝出任副首席顧問，惹來外間對中策組「無人駕駛」嘅質疑。
穩陣起見 遲到好過冇到
據聞梁班子都係啞仔食黃連，當中有不為人知嘅苦衷。眾所周知，梁班子對中策組首席顧問早有心水人選，呢個就係現年六十二歲嘅邵善波，原本大家都認為呢個任命萬無一失，事關邵善波○七年已開始做全職顧問，依家由全職顧問「升呢」做首席顧問，照計坐正唔應該有乜障礙，點知臨門一腳有人話始終係政府換屆，為咗穩陣起見都係做埋品格審查好啲，所以先搞到七一都未能公布任命，最終延至尋日先至公布，任期由即日起至一七年六月三十日為止。
雖然遲到，但好過冇到，經過今次事件，有政界中人就向當局獻計，建議應該考慮將中策組任期延至七月一日之後，避免政府換屆期間可能出現職位空缺，可以等新政府有時間走盞。講番邵善波上任，CY就讚佢長期從事公共政策研究，並且在中央政策組服務多年，具備豐富經驗，有信心佢領導嘅中策組工作會有出色嘅表現。