政情：無懼通頂 黃定光扮瞓覺？
建制派議員正打算通宵開會力敵「拉布三人組」，今早將會有決定。政制及內地事務局局長譚志源（Raymond）尋日就話，佢卅年前做大學宿生會委員時，已有豐富嘅通宵經驗，而局方喺星期三亦會調配剛大學畢業嘅年輕同事擔任「全程監察小組」（即係議員狗仔隊），人手亦會增加一倍至四十人，Raymond又提醒一眾年紀較大嘅議員要多飲湯水備戰。
不過，對平均年齡無七十歲都有六十嘅建制派嚟講，飲幾多湯水可能都唔掂。有物理治療師話，如果一個人長期保持同一個動作，例如寫大字，肌肉好易會有勞損，如果長時間抬高頭，就會好易見頭暈，如果你咁啱有頸椎退化，仲分分鐘會導致呼吸困難添。
本身患睡眠窒息症，上星期「頭岳岳」瞌眼瞓嘅民建聯立法會議員黃定光，就話自己通宵都頂得順，佢仲澄清自己上星期只係「扮瞓覺」﹕「所以毓民一叫我就醒！」其實當日叫醒佢嗰個係長毛唔係毓民囉，捱通宵會唔會投錯票架！