J.Lin曳曳啦你!

紐約人人氣王林書豪一向以虔誠基督徒形象深入民心,但昨日美國傳媒就大踢爆,揭發J.Lin亦有「瘋」狂一面!《紐約郵報》報道,紐約人於首輪季後賽出局後,林書豪便率領幾名隊友到酒吧徹夜狂歡,期間更有不只一個目擊者目睹J.Lin豪飲兼兜搭索女。

飲到啤啤夫 溝內衣名模

紐約人上周四被熱火踢出局,翌日夜晚林書豪便聯同隊友菲爾斯、夏利臣及謝洛美佐敦攜手出擊,殺落位於曼哈頓的SL酒吧狂歡。據店內目擊者爆料,四位球員全枱放滿伏特加及香檳,向來極少飲酒的J.Lin亦一反常態杯杯清,似乎為紐約人提早放暑假而借酒消愁。

期間林書豪飲到「啤啤夫」,被大堆着緊身衫的索女包圍,對此J.Lin顯得來者不拒,就連前Victoria's Secret模特兒Selita Ebanks及後亦加入戰團,這位29歲內衣名模樣靚身材正,連Top Model都主動埋身,J.Lin睇嚟非常受落,二人全程有講有笑,「進展」相當順利。一眾紐約人球員玩到當地凌晨3點半仍「未夠喉」,之後轉場到另一間夜店1OAK再劈過,有調酒員指J.Lin喪隊Tequila,玩到凌晨4點至盡興離開。

林書豪夜蒲劈酒令球迷大跌眼鏡,但其人氣及魅力依然沒法擋,這位美籍華裔球星今夏將成為受限制自由身球員,紐約人已計劃開出一份年薪500萬美元的中產合約綁實這棵搖錢樹。

回復自由身 速龍欲挖角

不過,《紐約每日新聞》就指速龍為提升入座率,一旦羅致拿殊失敗的話,就會全力斟介林書豪過檔。另上位短短日子已躋身今季NBA第2「賣衫王」嘅J.Lin,NBA官方合作夥伴adidas昨宣布其紐約人Swingman版主、客球衣將於本月17日登「台」,分別有成人及小童版本,將於全台灣過百間體育用品店公開發售。

本報綜合報道